El mga autoridad ya aresta un objetivo de alto valor, o HVT, y ya confisca P340,000 valor de droga ilegal na un operacion contra droga na provincia del Zamboanga del Norte, asegun con el Philippine Drug Enforcement Agency (PDEA) del Sabado.
Si Maharani Gadaoni-Tosoc, el director regional del PDEA, ya identifica con el arestao HVT como si Cyril Gumalingan, conocido tamen como si Roldan Tubol, 50 años el edad y un chufer de habal-habal.
Asegun con Gadaoni-Tosoc, con Gumalingan ya aresta na un operacion de compra busto mga alas 9:12 del Viernes denoche na Barangay Miputak, ciudad de Dipolog, el capital del provincia del Zamboanga del Norte.
Asegun con Gadaoni-Tosoc, ya confisca na posesion de Gumalingan aproximadamente 50 gramos de suspechao shabu que tiene el valor de P340,000, un celpon, un licensia de chufer, y dinero de compra busto.
Si Gadaoni-Tosoc ya habla, ya detene con Gumalingan en preparacion para el plantada del caso contra conele por violacion del Ley Integral de Drogas Peligrosas de 2002.
Si Gadaoni-Tosoc ya habla, el operacion de compra busto ya conduci el mga agentes del PDEA con el suporta del diferente unidades del policia base na provincia del Zamboanga del Norte. (B. Garcia)