Cuatro personas el ya aresta y valor de P2.2 millones smuggled asucar el ya confisca el mga autoridad na un impulsado de inteligencia operacion contra smuggling na ciudad de Zamboanga, asegun con el policia del Lunes.
Si Police Brigadier General Bowenn Joey Masauding, el director del mando regional del policia, ya habla el cuatro arestao personas ta inclui 48 años chufer, un 44 años alternativo chufer, y dos tripulantes quien tiene el edad de 43 y 49 años.
Asegun con Masauding, con el cuatro personas ya aresta el combinao operativas del policia y Buro de Aduana mga alas 3:40 del Lunes aga na un privado baradero na Barangay Cawit, ciudad de Zamboanga.
Si Masauding ya habla, ya confisca na un trak 900 sacos de 50 kilos cada uno con el estimao valor de P2,250,000.
Asegun con Masauding, tiene pa omento sacos que tiene el igual producto el ya encontra serca na trak confirmando mas del mga ilicito cargamento.
Si Masauding ya habla, el Buro de Aduana na Pantalan de Zamboanga na proceso pa de completar el inventario del mga confiscao asucar, que ta inclui el na trak de 10-rueda que ya usa para transporta con el mga contrabando.
Asegun con Masauding, el mga arestao suspechao hay enfrenta el caso for violacion del Ley de Republica 10611 (Food Safety Act of 2013) y Ley de Republica 10845 (Anti-Agricultural Smuggling Act of 2016).
Asegun con Masauding, ta conduci sila mas investigacion para identifica conel dueño del contrabando, quien tambien responsable. (B. Garcia)