Cuatro gentes, incluido dos soldao, el ya muri mientras 12 otros el ya heri y un trak de militar el ya quema durante un tirahan contra con mga mal elementos del sociedad que ya suporta mga miembros del Moro Islamic Liberation Front (MILF), quien mga saboteadores de paz, na municipio del Sumisip, Basilan, asegun con el militar del Jueves.
Asegun con Brigadier General Alvin Luzon, el comandante del 101st Infantry Brigade (101Bde), el tirahan ya ocuri pasada alas 4 del Miercoles tarde na Barangay Lower Cabengbeng, Sumisip.
Asegun con Luzon, el mga muerto y herido soldao amo mga personajes del 32nd Infantry Battalion del Army. Con el mga herido soldao ya lleva na Lamitan City District Hospital y despues ya transferi para na Camp Navarro General Hospital na ciudad de Zamboanga.
Asegun con Luzon, el mga tropas ta proporciona seguridad con el mga personajes del United Nations Development Programme (UNDP) cuando ya ocuri el tirahan.
Si Luzon ya habla, con el mga mal elementos del sociedad que ya man tirahan pati mga soldao ta encabesa canda Najal Buena y Oman Hajal Jalis, quien mga notorioso por el de ila participacion na violente conflictos, o rido, na mencionao lugar.
Tragicamente, asegun con Luzon, ya suporta cuantos miembros del MILF con el grupo de canda Buena y Jalis, elevando significativamente concierne sobre el de ila papel fomenta paz y estabilidad.
Si Luzon ya habla, dos siguidores del mal elementos del sociedad el reportao ya muri mientras hinde pa determinao si cuanto de ila ya heri.
El mga mal elementos del sociedad ya quema tamen con un KM450 trak de militar, causando mas perdicion material.
Si Luzon ya habla, el mga personajes del UNDP ya conduci mision de validacion y coordinacion con mga partes interesdadas para el participacion del comunidad na iniciativas de modelo proyecto de busca lavida.
El periodo del mision del mga personajes del UNDP na Basilan ya comensa del Martes y hay termina mañana, Viernes.
“El mision ya coordina por medio del Joint Peace and Security Committee (JPSC) bajo’l Joint Normalization Committee (JNC), con el suporta del mga lideres local,” si Luzon ya habla.
Condenando con el incidente, si Luzon ya hace el llamada con el liderato del MILF na Basilan para inmedietamente toma accion contra con aquellos de ila miembros envuelto na tirahan.
Asegun con Luzon, el de ila participacion ta prejudica con el principio del acuerdo de paz y ta amenasa con el progreso ya hace en el esfuerzos de normalizacion.
“Responsibilidad es critical para mantene confianza y asegurando el integridad del proceso de paz,” ya habla si Luzon.
Ta asegura si Luzon, cay el 101st Infantry Brigade y gobierno provincial y otro agencias de seguridad ta controla completamente con el situacion.
Si Luzon ya promete continua trabaja sin descanso para proteje con el comunidad y suporta con mga iniciativas de desarollo. (B. Garcia)