El Gobernador Hadjiman Hataman-Salliman ya condena en el mafuerza posible palabra con el sangrino encuentro que ya resulta na muerte del dos soldao y ya heri 12 otros na municipio del Sumisip del Miercoles tarde.
Dos mal elementos del sociedad, quien envuelto na tirahan contra con mga soldao, el reportao ya muri y indeterminado otros el ya heri.
Si Salliman ya nota cay con el incidente ya perpetra el mga malguiao meimbros del Moro Islamic Liberation Front (MILF) quien para estropea y destrosa con el paz y tranquilidad del provincia.
Asegun con Brigadier General Alvin Luzon, el comandante del 101st Infantry Brigade, el tirahan ya socede pasada alas 4 del Miercoles tarde na Barangay Lower Cabengbeng, Sumisip.
“Como el cosa ya confirma el militar, el incidente ya perpetra el mga malguiao elementos del MILF quein tiene el plano estropea o destrosa con paz y tranquilidad del provincia,” si Salliman ya habla na un anuncio.
“De amon reso y simpatia ta anda con el dos muerto soldao, con el de ila familias y con aquellos herido quien bajo ahora el curada medical na hospital,” ya omenta si Salliman.
El mga tropas del 32nd Infantry Battalion ta proporciona seguridad con el mga personajes del United Nations
Development Programme (UNDP) cuando ya ocuri el tirahan.
“Ta hace came el llamada con el liderato del MILF na Basilan y fuerzas de seguridad para busca un como lugar que resolve con el asunto y previni repeticion del incidente na futuro,” ya habla si Salliman.
“Ta llama tamen came con el mga Basileños para esta vigilante y calma cay el mga autoridad controlao con el situacion,” ya omenta si Salliman, hablando “nohay motivo de alarma.”
Ya enfatiza si Sallimam cay ta esta pacifico el provincia del Basilan a pesar el incidente. (B. Garcia)