Un negociante el ya muri na un incidente de toriteo na Barangay Cabatangan, en este ciudad, asegun con el policia local del Viernes.
El policia local ya nombra con el fatalida como si Noel Alvarez, 58 años el edad y residente de Sitio Shalum, Barangay San Roque, en este ciudad.
Asegun con el policia, con el victima ya tira mga alas 6:50 del Jueves denoche na camino de desvio na Barangay Cabatangan, en este ciudad.
Base na investigacion, si Alvarez ta maneja su vehiculo pa bolbida estaba na un gallera na Barangay Tumaga cuando ya decidi le para un rato y compra fescao desde con mga vendedor na canto’y camino.
Mas del investigacion ta aparece, para munta ya otravez si Alvarez na su vehiculo cuando ya tira conele el uno del dos desconosidos personas muntao na un motorsiclo que derepente lang ya abuya.
Asegun con el policia, ya tupa con el tiro con Alvarez na pescueso y enseguidas ya lleva na hospital con el victima, pero por mal suerte, ya declara con ele muerto el doctor.
Ya recubri el policia na lugar del crimen dos capsula de calibre .45 pistola.
El policia ta continua investiga con el incidente para determina so cosa el motivo y si quien el mga echor del incidente. (B. Garcia, photo courtesy by Regino Delos Santos)