Ya anuncia el City Social Welfare and Development Office (DSWDO) cay 338 familiares compuesto de 1,485 personas el ya afecta na ensendio del Sabado denoche na Sitio Asinan, Barangay Kasanyangan, este ciudad.
El CSWDO ya as el anuncio base na resulta del de ila evaluacion na lugar del ensendio que ya ase mga personajes del mencionao oficina del dia de Domingo.
Asegun con Ma. Socorro Rojas, el hefe del CSWDO, cay na total numero del afectao familiares, 240 de ila amo mga dueño del casa, 71 ta arkila casa, 55 ta esta hunto na casa del de ila familya, 19 ta arkila posento, y tres mga encargao de casa.
Asegun con Rojas cay 240 mga caserias el ya man uput na ensendio.
Si Rojas ya abla cay el resulta del de ila evaluacion ay sirvi como base o giya del govierno y otro ahensias na dalida de ayuda y otro suporta con el mga afectao familya.
El ensendio ya principia na un casa durante un celebracion de casamiento y derefente ya man calayat y engranda el fuego y rasa con 240 caserias.
Un persona el ya muri cay ya man koriente el victima y otro dos ya iri durante el ensendio.
El estimao destroso de propiedad ya alcansa na cantidad de P3 milyones. (B. Garcia, photo courtesy of City Disaster Risk Reduction and Management office)