Seis personas el ya aresta myentras valor de P7.1 milyones cantidad de contrabando el ya confisca mga otoridad aqui na ciudad de Zamboanga.
Asegun con Police Brigadier General Neil Alinsañgan, el director rehyonal del pulisiya, cay con el mga suspechao ya aresta y con el contrabando ya confisca mga alas 11:15 del Sabado denoche na vicinidad de island de Manalipa, este ciudad.
Si Alinsañgan ya nombra con el mga arestao suspechao como el siguentes: Sukrimar Jose, 33, el maestro patron del jungkung; Kiram Sali, 54; Masaron Sahiron, 39; Ayyub Abbas, 69; Jun Alpa, 55; y si PJ T Milagrosa, legal el edad. Todo sila mga residentes del municipio del Pata na provincia de Sulu.
Si Alinsañgan ya habla cay ta man patrulya el mga personajes del pulisiya, Buro de Aduana y soldao, cuando ya columbra sila con un jungkung nombra como el FB Hayarana con seis tripulantes.
Durante el inspeccion, ya descubri mga otoridad cay ta carga el jungkung 203 cahon y 66 reams del different clases de cigarillo que tiene el valor de P7.1 milyones.
Enseguidas ya aresta con el seis tripulantes despues que ya falya sila presenta documento del de ila cargamento, y ya confisca con el mga cigarillo.
Con el arestao seis tripulates, mga confiscao cigarillo y jungkung ya pone bajo na custodiya del 2nd Zamboanga City Mobile Force Company y esperansao entrega na Buro de Aduana para el proppio disposicion. (B. Garcia, photo courtesy of Zamboanga City Police Office)