Tres rebelde New People’s Army (NPA) el ya rindi con mga autoridad amediante del sin descanso ofensiva contra canila na provincia del Misamis Occidental, asegun con el militar del Martes.
Si Tiniente Coronel Jose Andre Monje, el comandante del 10th Infantry Battalion (IB), ya nombra con el tres rebelde NPA quien ya rindi como canda Nida Dumaog alias Ka Wowie, 51 años el edad; Reynaldo Hunahunan, 42; y si Dandrick Delos Santos.
El tres rebelde NPA ya rindi con mga personajes del 10IB del otro semana na Barangay Bagong Nayon, Concepcion, Misamis Occidental.
Todo sila tres mga miembros del Guerrilla Front Sendong que ta opera na interior del provincia del Misamis Occidental.
Asegun con Ka Wowie y su dos uban, el dificultad na vida que ya experiencia sila amo el primer rason si porque ya decidi sila rindi.
Asegun con Ka Wowie, pirmi sila ta man problema para de ila necesidades basico como el durmida y comida, incluido ya el pirmi de pensar aserca del ila familia.
Asegun con Ka Wowie, tiene pa del de ila mga uban el quiere rindi por causa del sin descanso ofensiva del militar, palta logistico, hasta el palta direccion y objetivo del de ila mga lideres.
Si Monje ya asegura cay ay cuida y ayuda sila con el tres antes mga rebelde NPA para puede queda parte del Enhanced Comprehensive Local Integration Program (E-CLIP) del govierno.
Asegun con Monje, un oportunidad ya se de ila tres para reintegra na sociedad librao na problema de insurrection.
(B. Garcia, photo courtesy of 10IB)