Tres personajes de inteligencia del fuerza militar, o iSAFP, el ya muri na un incidente de emboscada na provincia del Basilan, asegun con el policia del Martes.
Asegun con el policia, el incidente ya socede mga alas 6:25 del Lunes denoche na Barangay Baimbing, ciudad de Lamitan, Basilan.
El policia nohay identifica con el tres muerto personajes del ISAFP, quien base na ciudad de Zamboanga, siendo tiene pa sila que asegura con el mga nombres del mga victimas.
Base na investigacion, el mga victimas abordo na un vehiculo atravesando na carretera del ciudad de Lamitan cuando ya embosca canila mga desconocidos armao personas na Barangay Baimbing.
Asegun con el policia, el lugar del incidente mas o menos 15 kilometros el distancia desde’l centro del ciudad de Lamitan y nohay signal de celpon.
El policia ta conduci en profundidad investigacion para asegura el identificacion del mga armao personas responsable na emboscada del mga personajes del ISAFP.
Ambos el gobierno provincial, militar y policia recientemente ya declara con el provincia de Basilan librao desde’l grupo del Abu Sayyaf. (B. Garcia)Â