Dos mga “watch listed” suspechao de droga ilegal el ya aresta mga otoridad na dos separao lugar aqui na ciudad de Zamboanga.
Si Police Colonel Alexander Lorenzo, Zamboanga City Police Office (ZCPO) director, ya nombra con el maga arestao suspechao como canda Jifran Aril, 36 años, un ventero de fescao, y Sibal Langkasari, 19 años el edad, un chufer.
Asegun con Lorenzo cay con Aril ya aresta na un operacion contra droga ilegal maga alas 2:35 Huwebes aga na Barangay Mampang, este ciudad.
Con Aril ya puede confisca na su posesion 1.13 gramos de suspechao shabu que tiene el valor de P7,700, y P200 markao sen.
Si Lorenzo ya habla cay con Langkasari ya aresta maga alas 3:04 del Huwebes aga na Calle Campaner, Barangay Zone 3, este ciudad.
Asegun con Lorenzo cay ya puede recubri na posesion de Langkasari 0.80 gramos de suspechao shabu con el valor de P5,440, un portamoneda, y P200 markao sen.
Ya detene con el dos arestao suspechao y esperansao ay planta contra canila el asunto por violacion del “Comprehensive Dangerous Drugs Act of 2002.” (B. Garcia)