Dos soldao el ya heri na un explosion accidental na un base de patrulla na lejanos lugar na provincia del Basilan, asegun con el policia del Miercoles.
Asegun con police Colonel Cerrazid Umabong, el director del policia na Basilan, el incidente ya ocuri mga alas 4:10 del Martes tarde na base de patrulla del 45th Infantry Battalion na Barangay Bohelebbung, Tipo-Tipo, Basilan.
Si Umabong, na su report con Police Brigadier General Romeo Macapaz, el director del Police Regional Office-Bangsamoro Autonomous Region (PRO-BAR), ya identifica con el dos herido soldao como canda Private Danny Boy Maravillas y Private Jelmer Alalag del 45IB.
Si Umabong ya habla, base na investigacion ta limpia el mga soldao areredor del base de patrulla cuando derepente un bala del 40-milimetro desde un lanzagranadas M-203 el accidentalmente ya rebenta, hiriendo canda Maravillas y Alalag.
“El mga tropas ta quema mga seco ojas cuando ya ocuri el explosion,” si Umabong ya habla na un anuncio.
Asegun con Umbabong, con el dos soldao ya lleva na hospital del distrito de Lamitan para el curada medical.
Hay transferi con el dos soldao para na Camp Navarro General Hospital del Western Mindanao Command (Westmincom) para mas del curada medical.
El 101st Infantry Brigade ya imbia personajes del Explosive Ordnance Team (EOD) para limpia con el lugar y colecta fragmentos para el investigacion adicional. (B. Garcia)