El mga autoridad ya aresta cuatro objetivo de alto valor, o High-Value Targets (HVTs), na un operacion de aplicacion de ley que ya resulta na desmantelada del un cuarto de droga na provincia del Zamboanga del Sur, asegun con un oficial del Miercoles.
Si Maharani Gadaoni-Tosoc, el director del Philippine Drug Enforcement Agency (PDEA)-Zamboanga Peninsula, ya identifica con el mga arestao suspechao como canda alias Erick, 55, años el edad y el mantendero del cuarto de droga; alias
Alnesdal, 18, empleado del cuarto de droga; y mga clientes canda alias Renato, 26; y si alias Alnesal, 23.
Asegun con Gadaoni-Tosoc, con el mga suspechao ya aresta na un operacion de aplicacion de ley por medio na implementacion de orden de registro mga alas 4:05 del Martes tarde na Purok Ferdinand, Barangay Sto. Niño, ciudad de Pagadian, el capital del Zamboanga del Sur.
Asegun con Gadaoni-Tosoc, ya confisca na desmantelao cuarto de droga mas o menos 12.4 gramos de suspechao shabu que tiene el valor de P84,320, mga parafernales de droga ilegal, y mga bala de rifle armalite y calibre .9 milimetro pistola y tambien capsula.
El mga arestao suspechao presentemente bajo’l custodia del PDEA-Zamboanga Peninsula y hay enfrenta sila el caso por violacion del Secciones 6, 7, 11, 12, y 15 del Articulo Dos del Ley de Republica 9165 o mas conocido como el Ley Integral de Drogas Peligrosas de 2002.
El mga agentes del PDEA-Zamboanga Peninsula ya implementa con el orden de registro con el suporta del diferente unidades del policia na provincia del Zamboanga del Sur.
Este reciente acomplicimiento ta descata el inquebrantable dedicacion del PDEA para desmantela mga curators de droga y buncando con el actividades de droga ilegal na region.
Si Gadoni-Tosoc ya apela con el publico para reporta algun suspechoso actividades relatao na droga na de ila comunidades para ayuda na continuando peleya contra droga ilegal. (B. Garcia)