Dos peleao familiares na municipio de Tipo-Tipo, Basilan, ya termina de ila peleya por medio de firmar acuerdo de paz que ya facilita mga concierne agencias de gobierno y otro partes interesadas, asegun con el militar del Miercoles.
Asegun con el 45th Infantry Battalion (45IB), el mga signatorios del acuerdo de paz amo el familias de Teddy Ibong de Bohelebung y Indanan del Sitio Taguias, Barangay Bangcuang, Tipo-Tipo.
El areglo del peleya ya facilita el gobierno municipal de Tipo-Tipo en colaboracion con el 45IB, policia, y representantes desde’l Joint Peace Security Team (JPST) de Tipo-Tipo.
Asegun con el 45IB, el esfuerzos de mediacion es parte del continuando iniciativas de construccion de paz na lugar, punteria para resolve peleya pacificamente y evita mas escalada de tensiones.
Si First Lieutenant Romel Aglibot, el comandante del Bravo Company del 45IB, ya expresa su apreciacion por el esfuerzos del autoridades local y el envuelto comunidades, descantando el colaboracion entre el militar, gobierno local, y el crucial papel del enforsador de ley consiguiendo positivo resolucion.
El Vice Alcalde Ingatun Istarul del Tipo-Tipo ya comenda con el cooperacion del ambos partidos, hablando que el resolucion es un testamento del de ila compartido deseo por la paz.
Si Istarul ya enfatiza que el gobierno local hay continua trabaja hunto con todo’l partes interesadas para asegura que el comunidades hay esta unido y librao desde’l violencia. (B. Garcia)