Preparao ya todo para el conducida del primer Philippine Reserve Officers’ Training Corps (PH ROTC) Games 2023 aqui na ciudad del Zamboanga desde Agosto 27 hasta Septiembre 2, este año.
Si Dr. Rody Garcia, el director rehyonal del Commission on Higher Education (CHED), ya dale el aseguramiento durante el segundo hunta de coordinacion del Martes tarde na City Hall.
Asegun con Garcia cay tiene ya 1,332 estudiantes desde’l diferente escuela de colegio na sinco rehyon del Mindanao el ya registra para participa na actividad de deportes.
Si Garcia ya habla cay el lugar onde esta y durmi mga atleta hasta el lugar del juego mayoriya ay ase na Joaquin F. Enriquez Memorial Sports Complex, y na mga escuela del Western Mindanao State University, Zamboanga Peninsula Polytechnic State University y na Zamboanga State College of Marine Sciences and Technology.
Sin embargo, ya admiti si Garcia cay tiene pa mga asuntos y conciernes el necesita solve antes el conducida del juego.
De mas temprano, el alcalde John Dalipe ya promete todo su suporta con el conducida del actividad de deportes como parte del advocacia del su administracion para introduci con el ciudad del Zamboanga como destinacion del turismo y de deportes aqui na rehyon.
El govierno ya aloca P1 milyon para el conducida del actividad de deportes aqui na ciudad de Zamboanga. (B. Garcia, photo courtesy of Zamboanga City Sports Development Office)