Tres personas ya iri na un accidente vehicular envuelto dos motorcyclo na camino del canto’y aplaya na Barangay Talisayan, aqui na ciudad de Zamboanga.
El Zamboanga City Police Station 9 (ZCPS9) ya nombra con el mga victima como canda Jay-ar Padron, 30 años el edad y residente de Barangay Muti; Raven Kyle Alppez, 21; y si Ella Alinquitan, ambos mga residentes de Barangay Talisayan.
Asegun con el ZCPS9 cay el accidente ya ocuri mga alas 10 Martes denoche na camino del canto’y aplaya na Barangay Talisayan.
Base na investigacion del ZCPS9, cay antes del incidente, si Padron ta maneja motorcyclo y ta viaja para na direccion del Barangay Ayala myentras si Alppez, quien ta maneja tamen motorcyclo, ta navega para na dirrecion de Barangay Labuan y ta sigi conele ankas si Alinquitan.
Asegun con el ZCPS9 cay el dos motorcyclo ya man bangga-an despues que si Padron ya crosa para na otro lao del camino donde ta pasa canda Alppez y Alinquitan.
Todo sila tres ya sufri irida na de ila mga cuerpo. Con Padron ya lleva para na Camp Navarro General Hospital del fuersa militar myentras con Alppez and Alinquitan ya lleva para na Zamboanga City Medical Center.
Todo el dos motorcyclo que ya sustene destroso ta esta ahora bajo na custodiya del ZCPS9. (B. Garcia, photo courtesy of ZCPS9)