Dos miembros del Barangay Peacekeeping Action Team (BPAT) el ya muri na un incidente de emboscada na provincia del Basilan, asegun con el policia del Sabado.
Si Coronel Cerrazid Umabong, el director del policia na Basilan, ya identifica con el dos fatalidades como canda Hasid Dohong Bidalul, 37 años el edad y residente del Barangay Tongsengal, Sumisip y si Ridzman Asdaman, 42, de Barangay Limbocandis, Sumisip.
Ambos si Bidalul y Asdaman mga miembros del BPAT na municipio del Sumisip, provincia del Basilan.
Asegun con Umabong, canda Bidalul y Asdaman ya muri na un incidente de emboscada del Biernes tarde na Sitio Katuli, Barangay Tumahubong, Sumisip, Basilan.
Asegun con Umabong, el dos victimas abordo na un motorciclo ta viaja para na Barangay Tumahubong estaba na Barangay Buli-Buli cuando ya ripica de tiro canila el cuatro mga armas personas.
Si Umabong ya habla, el dos victimas ya sufri mucho irida de bala na de ila cuerpo y ya muri na lugar del incidente.
Si Umabong ya habla, ta investiga sila si cosa el motivo y si quien el mga suspechao del incidente. (B. Garcia)