El Zamboanga City Police Office (ZCPO) ya planta ya caso criminal na fiscalia contra con el suspechao na reciente matansa del un anunciadora na ciudad del Zamboanga.
Asegun con Coronel Kimberly Molitas, el director del ZCPO, el caso criminal ya planta contra con el mismo subrino del victima, con quien ya identifica mga testigos del incidente.
Si Molitas ya habla, con el suspechao ya aresta na su residencia na Calle Comet, Barangay Tumaga, siguiendo el completo investigacion y esfuerzos colaborativo del mga unidades del ZCPO.
Asegun con el policia, con el victima, si Maria Vilma Rodriguez, 56 años el edad, ya mata del Martes denoche na tienda del su hermana locao na costao lang del residencia del victima na Calle Comet, Barangay Tumaga.
Si Rodriguez amo el anunciadora del programa de Barangay Action Center on 105.9 E-Media Production Network, Inc., base na ciudad de Zamboanga.
Si Molitas ya habla cay cuantos dias antes de incidente, si Rodriguez y su 33 años subrino ya man purpiahan sobre asuntos de familia y peleya de teirra na barangay hall del Tumaga.
Asegun con Molitas, el arestao suspechao detenido na facilidad de detencion na quartel del ZCPO. (B. Garcia)