“Among isaad kang Governor Rosalina “Nanay Nene” Jalosjos nga among amomahon ug palambuon kining 10 mil ka mga semilya sa tilapia gikan sa kagamhanang-probinsyal pinaagi sa Office of the Provincial Agriculturist Office (OPAG)”.
Kini ang giluwatang pamahayag ni Mr. Lorenzo Baut, presidente sa Tantingon Subanen Farmers Association (TSFA) human iyang nadawat gikan OPAG District Farm Technician, kinsa mi-representar ni Governor Jalosjos ug Provincial Agriculturist Ms. Maybel Bustaliño sa gipahigayong Tilapia Fingerlings Dispersal.
Ang uban pang nadawat sa TSFA naglakip sa 2 ka bags nga floater seeds, 2 ka rake, 2 ka pala, 2 ka barrel (200 liters) 6 ka kilong Follar fertilizers, 9 ka sakong abono (50 kilos), 4 ka latang liso sa repolyo ug nagkalain-laing chemicals. Samtang nakadawat usab ang Marupay Farmers Association gikan OPAG ug 6 ka bags nga fertilizer (50 kgs), rake (2), pala, (2) barrel (2), pruning shear (2), follar fertilizer (2 kls) ug 2 ka lata sa liso sa baguio beans, ingon man nagkalain-laing chemicals.
Alayon, kinasing-kasing nga gipasalamatan ni Tantingon Punong-Barangay Ruel Santiago si Governor Nanay Nene Jalosjos sa iyang pagpaningkamot nga matagamtaman ang mga ayudang ilang gipangindahay sa hataas nga panahon.
Matod pa ni Kapitan Santiago, wala siya magatoo nga bisan sa kalayo sa iyang barangay, wala gihapon niya hikalimti ang katawhan sa Tantingon nga sa hataas nang panahon, nahikawan sa kahigayonan ug ayuda. Alayon niini, iyang gi-awhag ang iyang ka-barangay nga ampingan ang ilang nadawat gikan sa kagamhanang-probinsyal.
Uban niini, iyang gi-awhag ang mga mag-uuma nga ila kining ampingan ug palambuon aron dili masayang ang damgo ni Gov.”Nanay Nene” alang sa mga ZaNortehanon. Gawas niini, nahatagan usab ug paniudto ang tanang mitambong sa maong kalihokan, lakip na ang bata ug mga hamtong nga nakatilaw sa libreng lugaw.
Lakip sa mitambong sa Tilapia Fingerlings Dispersal ug Farm Inputs Distribution nga tipik sa ZNag Fishery Development Program sa OPAG mao sila si 2nd District Board Member Atty. Jasmin Pinsoy-Lagutin, kanhi Assistant Provincial Administrator Mr. Aurelio “Tata” Monteclaro, Atty. John Henrick Vallecer, Mr. Leonides Parilla, ug Atty. Clyde Naong ug Mr. Jojo Villaester. (PIC-ATRuda)
(Source: Provincial Government of Zamboanga del Norte Facebook page)