Kidapawan City – Gitunol ni Kidapawan City Mayor Pao Evangelista karong adlawa, Nobyembre 18, 2024 (Lunes) ang cash reward ngadto sa tulo ka impormante nga mitultol sa mga awtoridad sa mga suspek sa likod sa serye sa motornapping sa siyudad.
Si Evangelista nagkanayon nga ang tulo ka tipsters nakadawat matag usa og P75,000 nga cash ug usa ka brand new motorcycle units gikan sa kagamhanan sa dakbayan.
“As promised, atoa nang gi-release ang reward sa mga naka aresto og mga carnapper ug kawatan diri sa Kidapawan,” pahibawo sa mayor.
Sa talaan gikan sa Kidapawan City Police Office nagpakita nga labing menos 13 ka kaso sa motornapping ang natala sa siyudad sa miaging buwan lamang.
“Sa mga interesado, padayon ang atoang reward system isip force multiplier nga makatabang sa kapulisan nga mapugngan ang mga krimen sa atoang dakbayan; because, crime prevention and suppression is everybody’s responsibility.
Magmabinantayon kitang tanan aron makab-ot ang usa ka luwas ug malinawon nga komunidad,” ingon ni Mayor Evangelista. (Rem Agdon)