Dos personas el ya aresta y ya confisca mga armas de fuego de alta calibre, explosivo, y droga ilegal mga autoridad na un operacion de aplicacion de ley aqui na ciudad, asegun con el policia local del Jueves.
Asegun con el policia local, con el dos arestao personas ya conose lang como si Marlon, 26 años el edad y residente de Sitio Rancho Narra, Barangay Latuan, y si Edwin, 47, un residente de Sitio Tuktukalaw, Barangay Quiniput, en este ciudad.
Asegun con el policia, con Marlon y Edwin ya aresta el combinao grupo de pulis y militar na un operacion de aplicacion de ley por medio de servir orden de buscada contra con un tal Absari mga ala 1:51 del Miercoles tarde na Sitio Tuktukalaw, Barangay Quiniput, en este ciudad.
Asegun con el policia, nohay puede aresta con Absari siendo nohay ele na lugar durante del servida del orden de buscada.
El mga autoridad ya puede recubri un calibre .45 pistola, un improvisado calibre .22 con mga bala, un granada, un granada de fusil, dos gramos de suspechao shabu que tiene el valor e P13,600 y un pesador.
Asegun con el policia, con el dos arestao suspechao ya pone bajo’l custodia del Zamboanga City Police Station 2 en preparacion para el plantada del asunto contra canila. (B. Garcia)