El fuersa naval anuncia del Miercoles cay ya puede sila salva 123 victima de “trafficking-in-persons TIP)”, y ya confisca mga explosivo, pusil, bala y droga ilegal na un operation de aplicacion de ley na provincia de Sulu.
Asegun con Rear Admiral Donn Anthony Miraflor, el comandante del Fuersa Naval na Weste Mindanao (NFWM), con el mga victima ya puede salva del Martes na isla de Tubalubac, Barangay Aluh Bunah, Pangutaran, Sulu.
Asegun con Miraflor ya puede tamen sila recubri mga pusil de alta calibre, mga bala y 10 gramos de suspechao shabu na un casa que ta ocupa el un tal “Jammang”.
Asegun con Miraflor cay base na investigacion, con el mga victima de trafficking-in-persons ya man recruit na provincia de Cebu y Bohol.
El mga victima ya revela cay porsaomente ta manda canila trabaja (subjected to forced labor) particularmente man fesca usando pana (spearfishing), asegun con Miraflor.
Ya revela pa el mga victima cay ta porsa pa canila manda usa shabu para aguanta sila con el condicion del de ila trabajo.
Asegun con el mga victima, bien armao el grupo del recruiters, incluido el un tal Jammang y su 15 compañeros poreso no puede sila ase nada si hinde conforma trabaja maskin contra na de ila gusto.
Sin embargo, el grupo del recruiters, si Jammang y su 15 compañeros ya puede escapa por causa de fronto el circulacion del informacion na isla de Tubalubac.
Asegun con Miraflor con el mga salvao victima de trafficking-in-persons ya pone bajo na custodiya del Ministerio de Servicio Sociales y Desarollo (MSSD).
Con el mga victima ya salva el fuersa naval junto con mga personajes del MSSD-Bangsamoro Autonomous Region in Muslim Mindanao (MSSD-BARMM), Naval Task Force 61, Ministerio de Trabajo y Empleo na BARMM (MOLE-BARMM), Women and Children Protection Center-Mindanao Fiel Unit, PNP-Special Action Force y otro pa concierne agencias de govierno. (B. Garcia, photo courtesy of Naval Forces Western Mindanao)