Ya omenta el capabilidad del Oficina de Proteccion Contra Incendios o el Bureau of Fire Protection (BFP) na provincia de Basilan por medio na intervencion del govierno provincial.
Ese ya vene despues que si Gobernador Jim Hataman-Salliman ya entrega del Martes un nuevo trak de bombero con el BFP na Basilan que ta omenta el capabilidad para responde na mga incidentes de incendio.
Si Senior Superintendent Kadil Acalul, el Basilan Provincial Fire director, ya recivi con el nuevo trak na un simple ceremonia na capitolio.
Asegun con Salliman con el nuevo trak de bombero ya compra por medio del ayuda del oficina del Senador Sonny Angara.
Con el nuevo trak ya designa na ciudad de Lamitan. El proivincia de Basilan tiene ya el total de 12 trak de bombero con el llegada del nuevo trak.
Si Salliman con optimismo cay puede enseguidas responde mga bombero na mga incidentes de incendio na provincia.
Mientras tanto, si Acalul y si Senior Fire Officer 4 Anthony Paculdo, el hefe del bombero na Lamitan ya presenta del Miercoles aga con el nuevo trak con Alcalde Rocerick Furigay del Ciudad de Lamitan.
Alegre si Furigay cay ya omenta el numero del trak de bombero na Lamitan.
El bombero na ciudad del Lamitan tiene ya el total de 5 trak siguiendo el llegada del nuevo trak del Miercoles. (B. Garcia, photo courtesy of Lamitan City government)