El “Philippine Army” ya designa con Brigadier General Alexel Musñgi, como el nuevo subcomandante de division para de administracion y operaciones del “11th Infantry Division (ID)” base na provincia de Sulu.
Asegun con el 11ID, si Musñgi ya releva con Brigadier General Taharudin Ampatuan, con quien de mas temprano ya designa como el subcomandante de operaciones de defensa exterior del “Western Mindanao Command (Westmincom)”.
Si Major General Ignatius Patrimonio, comandante del 11ID y “Joint Task Force Orion”, ya encabesa con el ceremonia del cambio de jefe de oficina, donde si Ampatuan ya entrega su mando con Musñgi como el nuevo subcomandante de division para de administracion y operaciones.
Durante el ceremonia, si Patrimonio ya dale un Placa de Commando y medalla de merito militar con Ampatuan por su invaluable servicio y esfuerzos incansables que ya rindi le como el subcomandante del 11ID.
El entrego del simbolo de oficina con Musñgi ya sigui despues del dalida de honor con Ampatuan.
Na su mensaje, si Patrimonio ya comenda con Ampatuan por su excelente liderato y ya felicita con Musñgi como el nuevo instolao subcomandante del 11ID. (B. Garcia, photo courtesy of 11ID)