Si Brigadier General Alvin Luzon, el comandante del 101st Infantry Brigade, ya conduci dos dias dialogo con mga antes violente extremistas para fortifica el fundacion de paz, solidaridad y prosperidad del provincia de Basilan.
El dos dias dialogo ya conduci na dos separao lugar. El primero na quartel del 45th Infantry Battalion (IB) na Barangay Bohe Pahu, Ungkaya Pukan, Basilan, del Jueves.
El segundo, na Barangay Tumahubong, Sumisip, Basilan del Viernes.
Asegun con Luzon, el objeto del dialogo amo para atende con mga ta prevalese asuntos y conciernes sobre el andansa del iniciativas de paz y desarollo dentro del sector de seguridad y para reconoce tamen con el esencial papel y contribuciones del maga antes extremista para adelanta el mga mision.
Si Luzon ya dale importancia con el invaluable papel del mga antes extresmista na asociacion colaborativo con el sector de seguridad para defende con el paz, seguridad y desarollo in provincia de Basilan.
Ya comenda si Luzon con el 45IB por facilitar directa comunicacion con el mga antes extremistas, adoptando plataforma de reconciliacion y sustenido cooperacion.
El dialogo nombrao como el hora del comandante del brigada con el mga antes extremistas. (B. Garcia)