El mando regional del police o “Police Regional Office-9 (PRO-9)” ta conduci intensificao campaña contra armas de fuego o pusil sin licensia na region.
Asegun con Police Brigadier General Bowenn Joey Masauding, el director del PRO-9, ya conduci sila total de 560 operacion contra armas de fuego sin licensia desde Enero 1 hasta Marso 31 na region.
Na total de 560 operacion, asegun con Masauding, tiene el total de 71 individual el ya aresta mientras 496 armas de fuego sin licensia el ya confisca mga operatives del policia.
Asegun con Masauding, el mas notable entre el operaciones amo el confiscacion del diferentes calibre de armas de fuego, bala, y parafernales del Marso 11 na municipio del Payao, Zamboanga Sibugay.
Si Masauding ya habla, tiene tamen total de 106 pusil que nohay renova el licensia el ya entrega na de ila custodia.
Asegun con Masauding, has continua sila el campaña contra armas de fuego sin licensia para asegura el proteccion y seguridad del mga vivientes na region. (B. Garcia)