El quartel del Philippine Army, por medio del 1st Infantry Division (1ID), ya dale equipajes de repuesta de desastres con el 101st Infantry Brigade (101Bde), asegun con el militar del Sabado.
Si Brigadier General Alvin Luzon, el comandante del 101Be, ya recivi con el mga equipajes del Viernes que ya lleva na Campo Luis Biel II na Barangay Tabiawan, ciudad del Isabela, Basilan, si Tiniente Coronel Edgar Allan Villanueva, el jefe del Oficina de Asuntos de Auxiliar Activo CAFGU del 1ID.
Asegun con Luzon, el mga equipajes que ya recivi le ta inclui Individual First Aid Kits (IFAKs), panel solar, y otro equipo esencial de mision.
“Este mga articulos hay mejora el capabilidades del mga Auxiliar Activo CAFGU (CAA) na Basilan,” Si Luzon ya habla.
“El mga atriculos hay permiti tambien con el de aton mga Auxiliar Activo CAFGU para responde na mga emergencias mas efectivamente y suporta con el resiliencia del comunidad na provincia,” si Luzon ya omenta.
Si Luzon ya expresa su gratitud por el suporta, descatando el importancia de equipar con el mga CAAs con mga necesario herramienta para hace de ila deber eficiente y sin peligro.
Ya enfatiza si Luzon cay el mga recursos crucial na fortalecimiento del preparacion operacional del mga CAAs, especialmente na mga lejanos lugar donde vital de ila presencia hinde lang na mantencion de paz y orden pero durante tamen de calamidades y natural desastres. (B. Garcia)