El 101st Infantry Brigade (101Bde) del Philippine Army ya quita todo’l mga buscado posters y lonas del mga miembros del grupo Abu Sayyaf o ASG na Basilan, un significante movimiento para paz y seguridad del provincia.
Si Brigadier General Alvin Luzon, el comandante del 101Bde, ya habla del Miercoles, el quitada del mga buscado posters es parte del un grande esfuerzo para el declaracion del Basilan como un provincia librao desde ASG.
“El decision para quita con el mga posters y lonas del buscado ASG esperansao fomenta un renovado sentido de normalidad y seguridad entre mga Basileños,” ya habla si Luzon na un declaracion.
Si Luzon ya habla, el mga restante miembros del ASG recientemente considerao y declarao como mga elementos criminales cay ta continua sila conduci actividades criminal como extorcion y graves amenaso, de quien existencia hinde na alineao con el objetivos y ideologias na establicida del ASG.
“No puede mas sila influencia con el comunidad y nohay mas sistema de suporta para sobrevivencia,” si Luzon ya habla.
Ya enfatiza si Luzon cay el inminente victoria contra con el ASG es un acomplicimiento colectivo del local comunidades, unidades del gobierno local, agencias de aplicacin de ley, y del militar.
Asegun con Luzon, el venedero declaracion del Basilan como un librao provincia desde’l ASG hay queda historico marca, sublinhado el esfuerzos exitoso para eradica terorismo y radicalismo.
Si Luzon ya habla, el declaracion es antecipado encoraja mas desarollo regional y inversion, reinforsando el paz que ya gana con todo dificultad. (B. Garcia)