Un persona mayor el ya muri y otro uno el ya iri na un incidente de incendio que ya raza ocho casa na ciudad del Zamboanga, asegun con el Zamboanga City Fire District (ZCFD) del Viernes.
Asegun con Superintendent Chirstopher Morales, el ZCFD marshal, el incidente del incendio ya ocuri mga alas 9:56 del Jueves denoche na Paseo de Sto. Niño, Barangay Tumaga, ciudad del Zamboanga.
Asegun con Morales, base na investigacion, el incendio ya prinicipia na casa de Expedito Gaganting, un persona mayor, y derepente ya man calayat para na sercanos casa.
Mas del investigacion ta dale mira cay si Gaganting ya muri porcausa nohay le puede sale na su casa durante el incendio. Nohay pa mientras tanto identifica con el irido victima, quien pariente de defunto Gaganting.
Asegun con Morales, el mga bombero ya puede controla con el incendio, que ya alcansa na segundo alarma, mga alas 10:29 del noche y completamente ya apaga mga alas 11:40 del noche.
Si Morales ya habla, P3.7 millon el estimao cantidad de destroso ya causa el incendio.
Asegun con Morales, ta investiga pa sila si cosa el causa del incendio. (B. Garcia)