El mga personajes del Criminal Investigation and Detection Group (CIDG) y otro unidades del policia ya aresta un persona mas buscada na un exitoso operacion de aplicacion de ley na provincia del Zamboanga del Sur, asegun con el policia del Viernes.
El mando regional del policia, ya identifica con el arestao persona mas buscada como si Leonardo Hibaya Aleria, listo como el numero sinco persona mas buscada na region y numero dos persona mas buscada na provincia del Zamboanga del Sur.
Asegun con el policia, con Aleria ya aresta na un operacion de aplicacion del ley mga alas 4:30 del Miercoles tarde na Purok Milay, Barangay Longmot, Tigbao, Zamboanga del Sur.
Asegun con el policia, si Aleria tiene pendiente orden de aresto sin recomendao piansa por el crimen de cuatro cuentas del abuso carnal que ya dale el un corte na ciudad de Pagadian, Zamboanga del Sur.
Mientras tanto, si Police Brigadier General Bowenn Joey Masauding, el director del mando regional del policia, ya alaba con el mga personajes del CIDG y otro unidades del policia por el exitoso aresto del numero sinco persona mas buscada na region.
“El aresto de Aleria es un prueba cay aquellos quien tiene caso criminal hay puede canila aresta el mga autoridad,” ya habla si Masauding. (B. Garcia)