Un lider del rebelde grupo New People’s Army (NPA) el ya muri na tirahan contra con mga soldao del otro semana na Barangay Obial, Kalamansig, Sultan Kudarat, el militar ya reporta del Lunes.
Asegun con el Western Mindanao Command (Westmincom) con el muerto rebelde lider del NPA ya conose como si Rey Masot Zambrano alias Dodong, el lider del Timlas Platoon del “Regional Operations Command” del NPA na “Far South Mindanao Region”.
Con el resto de Zambrano ya entrega con mga oficiales del Barangay Limulan y policia del Kalamansig para el propio disposicion.
Mismo mga familyares de Zambrano el ya conose con el muerto rebelde NPA.
Mientras tanto, si Tiniente Coronel John Paul Baldomar, el comandante del 37th Infantry Battalion, ya entrega con Jonas Cabantug con su mayores na municipio del Kalamansig del otro semana.
Asegun con Baldomar ya encontra el mga soldao con Cabantug ta esconde serca na lugar donde ya man tirahan sila contra con mga rebelde NPA na Barangay Obial, Kalamansig.
El Alcalde Joaquin Concha del Kalamansig ya para como testigo durante el entrego de Cabantug con su mayores. (B. Garcia, photo courtesy of 37th Infantry Battalion)