Maga soldao del 99th y 64th Infantry Battalion ya aresta con un persona y confisca no menos de media kilo suspechao shabu del otro dia alla na ciudad de Cotabato.
Asegun con Major General Roberto Capulong, commandante del Joint Task Force Central, con el arestao suspechao ya conose como si Buhare Totin Abusupian alias Warex Guinno Totin, con quien ya aresta na calle Bubong, Barangay Tamontaka, ciudad de Cotabato.
Asegun con Capulong cay ya puede recubri na posesion de Abusupian no menos de media kilo suspechao shabu que tiene el valor de tres punto cuatro milyones de pesos, un cellular phone, y maga cosas na uso de droga ilegal.
Asegun con Capulong cay el aresto del suspechao parte del de ila suporta con el Philippine Drug Enforcement Agency na campanya contra droga ilegal.
Si Capulong ya habla cay ya entrega sila con el suspechao na custodiya del PDEA na rehyon autonomo.
Con el suspechao esperansao planta forma asunto por violasyon del Comprehensive Dangerous Drugs Act of 2002. (Bong Garcia) (Photo Courtesy Joint Task Force Central)