Un persona el ya aresta y valor de P6.8 millones droga ilegal el ya confisca el mga autoridad na un operacion contra droga na ciudad de Zamboanga, asegun con el policia del Viernes.
Con el suspechao con quien ya aresta el combinao operativas del Philippine Drug Enforcement Agency (PDEA)-Zamboanga Peninsula y Regional Drug Enforcement Unit-9 ya conoce como si Akino Muharam, 24, un residente de Talipao, Sulu.
Asegun con el policia, con Muharam ya aresta na un operacion de compra busto mga ala 1 del Jueves tarde na calle Governor Camins, Barangay Canelar, ciudad de Zamboanga.
Asegun con el policia, un compañero de Muharam ya puede escapa cuando ya gole ele cay con mga agentes de gobierno sila ta hace transaccion de droga ilegal.
Ya confisca na posesion de Muharam un kilo de suspechao shabu que tiene el valor de P6.8 millones, nueve balutan de dinero de soborno que ya pone insima dos real P1,000 como markao dinero.
Na un entrevista na radio, si Muharam ya habla cay tiene lang quien ya paga conele para entrega con el paquete pero nohay le nombra si quien el dueño del paquete de shabu.
Asegun con el policia, ya detene con el arestao suspechao en preparacion para el plantada del asunto contra conele por violacion de Ley Integral de Drogas Peligrosas de 2002. (B. Garcia)