Un “High Value Target (HVT)” el ya aresta y ya confisca valor de P1.3 milyones droga ilegal mga otoridad na un campanya contra droga na provincia del Zamboanga del Sur.
Si Police Brigadier General Neil Alinsañgan, el director rehyonal del pulisiya, ya nombra con el arestao HVT suspechao como si Nashrodin Pido alias “Big Boss”, 20 años el edad y residente del Purok 1, Barangay Kakai Renabor, Tubod, Lanao del Norte.
Asegun con Alinsañgan con Pido ya aresta na un “buy-bust operation” mga alas 9:35 del Biyernes denoche na Purok Acacia, Barangay Anonang, Dumalinao, Zamboanga del Sur.
Asegun con Alinsañgan cay ya puede recubri na posesion de Pido 200 gramos de suspechao shabu con el valor de P1,360,000, un celpon, y P200,000 “boodle money” que ya pone insima un verdadero P500 markao sen.
Con el arestao suspechao ya pone bajo na custodiya de pulis na municipio de Dumalinao en preparacion para el plantada del asunto encontra conele.
Si Alinsañgan ya comenda con el mga operativas del “PNP Drug Enforcement Unit-9” y pulisiya del Dumalinao por el de ila acomplisimiento na campanya contra droga ilegal.
El confiscacion del mas de P1.3 milyones de droga amo el segundo grande valor que ya puede confisca el pulisya na rehyon del Biyernes.
Un HVT suspechao el ya aresta y valor de P8.8 milyones droga ilegal el ya confisca mga otoridad del Biyernes tarde na Barangay Maasin, aqui na ciudad de Zamboanga. (B. Garcia, photo courtesy of Police Regional Office-9)