El fuersa naval na Weste Mindanao ya confisca valor de P3 milyones “smuggled” crudo na provincia de Tawi-Tawi.
Asegun con Rear Admiral Donn Anthony Miraflor, el comandante del Naval Forces Western Mindanao (NFWM), ya habla cay con el smuggled crudo ya confisca na vicinidad del isla de Panampangan na municipio del Panglima Sugala, Tawi-Tawi del Biyernes.
Asegun con Miraflor cay ta man patrulya na mar el mga personajes del NFWM en coordinacion con el Buro de Aduana cuando ya columbra sila con un lancha nombrao como el MB Annabel serca na isla de Panampangan.
Si Miraflor ya habla cay el mga operativas ya descubri ta carga 250 baril ta contene 50,000 litro crudo con el valor de P3 milyones cuando ya inspecciona sila con el lancha.
Asegon con Miraflor cay enseguidas ya confisca con el crudo despues que ni uno del 11 tripulantes del MB Annabel el ya puede presenta documento del de ila cargamento.
Si Miraflor ya habla cay ya lleva con el lancha, tripulates, y el crudo na pantalan del Bongao, Tawi-Tawi y ya entrega na Buro de Aduana para el propio disposicion. (B. Garcia, photo courtesy of NFWM)