Nangipaay ti Omnico Natural Resources Inc, ti ili a Currimao ti walo a baro a desk top computer ken maysa a printer iti gobierno probinsial.
Segun ken Dr. Dany Daquioag, education consultant ti gobierno probinsial, paset daytoy iti panagresponde ti nadakamat a kompania iti panawagan ni Gob. Matthew Marcos Manotoc nga itutulong dagiti adda kabaelanna tapno maalay-ayan ti problema dagiti agad-adal ken dagiti mangisursuro iti agdama a Sistema ti edukasyon.
Naiyawat a mismo dagiti nadakamat a computer ken printer iti chief of staff ti gobernador a ni Atty. Pancho Jose a nangibagi ti gobernador pakairamanan ti education consultant ti probinsia.
Mainaig ti daytoy, in lawlawag ni Daquioag nga iti agdama keta wan pay dagiti napili a benepisiario kadagiti nasao a kagamitan.
Innayonna nga agtinnulong ti gobierno probinsial babaen ti Provincial Education office ken ti Department of Education Division of Ilocos Norte a mangkita kadagiti maiyannatup a benepisiario a mangkita nga agkasapulan unay kadagiti nasao a computer ken printer.
(Ronald Domingo, RPN DZRL Batac Correspondent)
(Source: Provincial Government of Ilocos Norte)