Iriga City — Naka-andam na si Vice Mayor Joefred Balagot kan Buhi, Camarines Sur na magpabakuna asin panginutan an Sangguniang Bayan kun boot naman ninda na magpabakuna asin matugutan na susog sa priority list kan mga tutudukan nin bakuna.
Iyo ini an sinabi kan VM matapos na maka-olay kan Radyo Ronda kasu-odma antes kan saindang session sa Sangguniang Bayan.
Kasu-odma kun magigirumduman, ipinaapod naman kan sangguniang an municipal health officer kan Buhi, tanganing maaraman an listahan ninda kan mga tutudukan nin bakuna asin an plano sa roll out na mangyayari sa sinambit ng banwaan.
An banwaan nin Buhi, an inot naman na nakipag-koordinar sa provincial health office kan CamSur tanganing maibali sa mga inot na matataw’an nin bakuna, mientras na nagtutubod an opisyal na dakol sa saindang munisipyo an boot ng magpatudok nin bakuna.
Mientras tanto, kinompirmar pa ni Balagot na aprobado naman kan NIA an rehabilitasyon sa control structure kaini sa lake buhi.
Tinaw’an nin duon kan VM na may abiso na saiya an liderato kan NIA tanganing mapunan an nasabing projecto na inot naman na hinahagad kan publiko huli sa mga pagbaha na nangyayari sa Danao kan Buhi.
An nasabing proyekto an makakatabang bako sana sa saindang banwaan kundi an mga pagtaraid na banwaan sa Rinconada kun sain digde minabulos an tubig hali sa Danao kan Buhi, CamSur.
(Melvin F. Barayoga, RPN DZKI Iriga OIC)
(Source: LGU Buhi, CamSur)