Cebu City – Giawtorisahan sa hunta probinsiyal si Gob. Gwendolyn Garcia pagbayad sa ₱ 6.8 milyones nga utang sa kompaniya sa construction ug construction supply sa paghatod og backfill material o anapog sa konstrobersiyal nga luna sa mga Balili sa Brgy. Tinaan, Naga City, Cebu.
Atol sa regular session sa board gahapon, giaprobahan ng resolusyon nga giduso ni Bokal Edsel Galeos sa ikaduhang distrito nga nag-authorize ni Garcia pagbayad sa Supreme ABF Construction and Construction Supply Company, Inc. og ₱ 6 milyones ug ₱ 881,440 sa pagdeliber og 27,663 ka cubic meter sa filling material alang sa land development project niadtong unang termino sa gobernador.
Matod ni Galeos, bisan sa mitumaw nga kontrobersiya ug sa “unfavorable circumstances” nga nakabalda sa procurement process sa proyekto, ang supply ug delivery sa  filling materials gipadayon sa Supreme ABF.
Apan sa maong higayon, ang Kapitolyo wala mobayad sa P6.8 milyones nga balance.
Dihang natapos ang termino ni Garcia pagka 2013, ang  Provincial Legal Office mirekomendar sa dili pagbayad sa kontraktor sanglit nakaso man ang proyekto. (Jhon Tadlip/JTY)
(Source: Cebu Provincial Government)