Cebu City – Gipangita pa sa kapolisan ang tawo nga misud sa buhatan sa accounting ug PSWDO o provincial social welfare & development office sa Kapitolyo gahapon sa kaadlawon ug misakiyo sa ₱ 16 mil sa usa sa mga hunos sa opisina.
Mao kini gibutyag sa labaw sa CPPO o Cebu Provincial Police Office, Col. Roderick Mariano, sa mga reporter.
Sumala pa ni Mariano, ang ₱ 16 mil nga nawala iya sa usa sa mga empleyado sa accounting office.
Matod niya, nakakuha na silag kopya sa video sa CCTV camera diin nakita ang usa ka lalaki nga migawas sa PSWDO ug misud sa accounting office.
Basi sa unang pakisusi, nakasud ang tawo sa PSWDO agi sa bangag nga butanganan sa aircon unit nga igo lang gitakpan og kahoyng tabla.
Midugang si Mariano nga ang responsable misud sa opisina nianang alas 12 pasado sa tungang gabii ug gipanghiling ang sud sa mga hunos sa local nga buhatan sa DSWD sa wala pa motapon sa accounting office.
Hangtod sa paghipos ning balita, gitug-an ni Mariano nga ila nang gitugyan ang pagpadayon sa imbestigasyon sa kapolisan sa Abellana samtang ang CPPO ang mosubay kon wala bay tulubagon ang mga guwardiya sa Kapitolyo sa insidente. (Jhon Tadlip/JTY)
(Source: Cebu Provincial Government)