Subling nagpahimangno ang Sarangani Provincial Health Office nga nagpabiling bawal ang “close contact” sa mga LSI/locally stranded individual, ROF/returning overseas Filipino ug sa tanang indibidwal nga naka-quarantine.
Segun ni Doctor Arvin Alejandro, ang provincial health officer, panigurado nga walay matakdan sa komunidad, sabton usa sa pamilya ug sa nahingtungdan nga bawal una sila magkaduol sulod sa mga adlaw nga gimando kanila sa taga-health office nga mag-kwarantina.
Ma-negatibo man ang resulta sa test nga gibuhat sa gigikanan nga lugar ug nag-quarantine na didto, dapat seryoso gihapon kining mupailalum sa proseso sa quarantine pag-abot dinhi aron masiguro nga wala kini bitbit nga Coronavirus tungod dili masiguro kung nitapot kini atol sa pagbyahe.
Kung dili gyud ka-agwanta ang pamilya, pwede kining muduol matud pa basta tres metros (3m) lang ang gilay-on sa naka-kwarantina ug dapat naka-face mask. Kadtong maghatud og pagkaon, ibilin lang sa lamesa.
Sa pagtuon sa PHO Sarangani, pwedeng matakdan ang tao kung kaisturya niini ang nag-positibo sulod sa kinse (15) minutos nga pag-isturyahanay usa ka metro (1m) ang ilang distansya, maliban na lang kung pulido nga nakasul-ob og PPE suit.
Makanunayon ang pag-awhag ni Governor Steve Chiongbian Solon sa mga katawhan nga dili kalimtan ang pagsuot og face mask, dos metros (2m) nga physical distancing ug paghugas sa mga kamot. Dili na mugawas og balay kung walay importanteng tuyo, ug mulikay sa tapok-tapok sa tao hilabi na nga aduna nay gikabalita nga local transmission sa mga katapad lugar sulod sa Rehiyon Dose.
(Sarangani Public Information Office)