Gikumpirma kagahapon ni Malapatan Mayor Salway Sumbo Jr., nga dunay usa ang patay ug walo ang gidala sa ospital human nakasinati og kalibanga ang mga residente sa sityo Anduway, Barangay Upper Suyan. Matud pa ni Mayor Sumbo usa ka purok chairman nga si Francisco Managka ang namatay gumikan nakasinati kini og sintomas sa grabing kalibanga.
Sa kalayo sa maong lugar nagsakay pa og kabayo ang mga health workers sa Malapatan nga gipadala sa maong lugar ug maoy naghatud sa walo ka pasyenti sa ospital nga kasagaran mga bata kay pulos nakasinati usab og parehong sintomas.
Dugang pa ni Mayor Sumbo nga posibling nakontamina ang gimontar nga water system sa maong lugar gumikan sa tubig baha human nakasinati og grabing pag-ulan ang nasangpit nga lugar ning nakalabayng adlaw. (John Rey Somido)
