Patay ang usa, samtang nasikop usab ang kauban niini, human nga nisukol sa mga kapulisan dihang nagpatuman sa pag serve sa Warrant of Arrest sa duha ka suspetsado, sa Barangay Bayong, lungsod sa Balamban, Cebu.
Sa Press Release nga gipagawas sa Balamban Municipal Police Station niadtong Agosto 13, 2024.
Usa ka hiniusang operasyon sa kapolisan ang gihimo sa Balamban Municipal Police Station pinangulohan ni PLTCOL JULIUS T GARCIA, Officer-In-Charge uban sa mga personahe sa 1st PMFC, Cebu PPO ug 64th SAC, 6SAB SAF.
Ang operasyon gihimo aron pagserve sa Warrant of Arrests (WOA) ni alyas “Joven” ug alyas “Pablo” (ngalan gipugngan) nga adunay kasong kriminal nga DUHA (2) KA PAGPATAY, FRUSTRATED MURDER ug Paglapas sa RA 10591.
Apan bisan pa sa legal ug relihiyoso nga pamaagi sa grupo, si “Pablo” nagpabuto sa iyang KG9 submachinegun ngadto sa operating team nga miresulta nga nibawos ang mga otoridad. Human sa pagsinukliay ug bala tali sa mga kapulisan ug sa suspetsado, narekober sa mga operatiba ang duha (2) ka long magazine, tulo (3) ka basiyo sa bala, kwarenta (40) ka bala sa 9mm ug KG9 Firearm nga dunay sulod nga magazine diha sa tuong bukton ni “Pablo”.
Si Pablo naigo sa iyang bat-ang ug diha-diha dayon gihatagan ug first aid sa SAF medic si “Pablo” ug gidala dayon kini sa Cebu Provincial Hospital-Balamban sa labing paspas nga rota nga ilang agian, tungod kay ang Brgy Bayong usa sa layo nga barangay sa Balamban, Cebu. Apan gideklarar siya nga dead on arrival sa nag-atiman nga doktor.
Samtang, gidakop si “Joven” didto sa iyang payag kapin o kulang 200 metros ang gilay-on gikan sa nahimutangan ni “Pablo” ug nakuha sa iyang posisyon ang mosunod nga mga ebidensya;
1) usa ka kalibre. 45 nga pistola, magazine nga gisudlan og 3 ka mga bala;
2) improvised nga handgun 7.62mm;
3) 50pcs nga bala; ug
4) gibanabana nga 1 ka kilo sa pinaugang dahon sa marijuana nga adunay DDB value nga Php 120,000.00
Ang dinakpan nga gihinganlan og “Joven” gipahibawo sa iyang mga katungod sa konstitusyon isip pagsunod sa Miranda Doctrine ug anaa na siya sa kustodiya sa Balamban MPS. (Ting Joe Pepito & Renante Socia Lada)