Nangandam na karon ang mga peace advocate sa tibuok isla sa Mindanao sa mahitabo nga tinuig nga Mindanao Week of Peace. Segun ni Ms. Jennifer Kamid, ang program manager sa Sulong Kapayapaan-Kalinaw program ni Governor Steve Chiongbian Solon, karon nga tuig, ang host matud pa sa Region 12 mao ang Provincial Government sa Sarangani ug ang Mindanao State University-General Santos City sa pamunuan ni Chancellor Dr. Anshari Ali.
Matag tuig ginasaulog sa Sarangani Province ang Mindanao Week of Peace. Apan karon nga tuig, pinasahi ang selebrasyon tungod bawal pa magtapok ang mga tao. Busa sugod karong Biyernes, Nobyembre 27, hangtud Disyembre 3, masaksihan online pinaagi sa Facebook ug YouTube ang upat (4) ka virtual play nga mag-presenta sa mga pagtulun-an ug ang mga padayong hagit sa pagkab-ot ug pagmintina sa kalinaw dili lang sa Mindanao kundili sa tibuok kalibutan.
Mensahe sa maong mga virtual play ang mga topiko kabahin sa interfaith dialogue, peace and conflict, healing and reconciliation, ug ang violent extremism nga kung dili kapugngan ang mu-resulta sa terorismo.
Virtual play kini nga daw galantaw og salida ang mga mulantaw. Ang mga character ang gikan sa mga college student sa MSU GenSan. Adtuan lang ang Facebook page sa “Kilos Kalinaw at 33rd SFDA” kon Season and Festival of Dramatic Arts o dili ba kaha sa YouTube.
Ala una traynta sa hapon (1:30pm), Biyernes, Nobyembre 27, makita sa Facebook ang virtual play gitituluhan og “Ang Bigkas ng Pagkakabigkis.” Pagasundan sa ikaduhang virtual play nga may titulo “Pandasal.”
Sa Disyembre 1, sugod gihapon sa ala una y media sa hapon (1:30pm), masaksihan ang ikatulong virtual play, may title nga “Mga Tala sa Lupa.” Ug sundan sa ikaupat ug katapusang virtual play gitituluhan og “Tunglo.” Nag-awhag si Governor Solon nga suportahan kini sa mga netizen. (Provincial Information Office – Sarangani)