Cebu City – Nanghinaot ang CCPO o Cebu City Police Office nga walay Misa de Gallo karong tuiga aron walay rason ang katawhan sa pagtapok nga kuyaw sa pagkatap sa coronavirus disease.
Suma pa sa director sa CCPO, Col. Josephino Ligan, ang Misa De Gallo nahisud sa mga oras sa curfew gikan sa alas 11 sa gabii ngadto sa alas 4 sa kaadlawon diin gidid-an ang mga tawo pagpanggawas gawas sa essential workers.
Ang CCPO, matod ni Ligan, dili morekomendar sa pagpahigayon sa Misa De Gallo tungod kay usa man kini ka hinugopan sa katawhan sa nagkadaiyang Parokya ug peligrong mosiaw ang pandemic.
Gawas sa pagdasok sa mga tawo, midugang si Ligan nga ang pagbantay sa Misa De Gallo maisip nga dugang trabaho sa kapolisan nga daan nang busy sa pagseguro nga mapatuman ang health protocols gawas sa pagbatok sa mga krimen.
Apan kon mahukman sa IATF o Interagency Task Force ang pagpadayon sa Misa De Gallo, mangayo na silag ayuda sa barangay sanglit ang kalihokan sa simbahan di man maato pagbantay sa 11 ka police station.
Kinahanglang patabangon sa barangay ang mga tanod pagbantay sa kahusay ug kalinaw sa mga simbahan panahon sa Misa de Gallo.
(Jhon Tadlip/JTY, photo courtesy by Cherisse Lopez)
(Source: Cebu City Police Office)