Cebu City – Mikabat og unom ka libo ka tawo o gatosan ka pamilya ug panimay sa probinsiya sa Sugbo ang temporaryong giatiman sa lainlaing LGU o local government unit.
Gawas niana, suma pa sa tinubdan, usa ka tawo ang gitahong namatay sa Dakbayan sa Danao human anora sa kusog nga bul-og sa tubig gikan sa miawas nga sapa.
Nasuta nga tungod sa nasinating pagbunok sa uwan sa Sugbo sa miaging gabii nga dugay ng mituang, upat ka lungsod ug usa ka dakbayan ang gilunopan.
Nag-uwan-uwan sa Sugbo tungod sa LPA o Low Pressure Area nga nasigpatan sa sidlakang bahin sa nasod.
Apektado sa pagsanap sa tubig-uwan ang mga lungsod sa Asturias, Balamban, Compostela, Tuburan ug Danao City.
Base sa record sa PDRRMO o Provincial Disaster Risk Reduction Management Office,  labing daghan og apektado ang Tuburan.
 Danao City
Gipabakwet sa mga sakop sa local disaster office sa dakbayan sa Danao samtang gihimo ang search and rescue operations sa mga tawo nga apektado sa pag-awas sa sapa gahapon sa buntag.
Si Roland Reyes, pangu sa CDRRMO o City Disaster Risk Reduction Management Office, mikompirmar sa media nga ang Tangon River misuyla nianang alas 6 sa buntag tungod sa way hunong nga uwan.
Matod ni Reyes, ilang gipahiklin ang 30 ka pamilya nga nagpuyo sa duol nga giisip nga peligro sa lunop.
Gitug-an ni Reyes nga nagpada na sila og mga sakop sa SRR o Search, Rescue, & Retrieval unit para pagpahigayon sa evacuation ingon man sa search & rescue operation sa apektadong mga lugar.
Midugang ang opisyal nga miaslay ang tubig sa ubos nga bahin sa Tangon river tungod sa grabeng uwan sa ibabaw.
Hangtod sa alas 10:15 nianang buntag, suma pa ni Reyes, nagpadayon pa ang pagpabakwet dihang ilang nasuta nga unom ka barangay ang apektado sa pag-awas sa sapa.
Kini mao ang barangays Poblacion, Suba, Tabok, Guinacot, Taytay, ug Guinsay.
Subay niini, padayon nilang gibantayan ang tubig sa Tangon River ug gitambagan ang mga mulupyo nga magmabinantayon sa ilang palibot.
Tuburan
Nakasinati usab og pagbaha ug lunop ang lungsod sa Tuburan, Cebu hinungdang gilusad ang rescue operations kagahapon.
Nahinabi sa mga tigbalita, si Bise Mayor Aljun Diamante mikompirmar nga adunay mga disaster ug rescue personnel apil ang mga sundawo nga nagtinabangay sa pagpahigayon sa evacuation gamit ang ilang mga ekipo.
Labing minos, 11 ka barangay sa Tuburan ang apektado sa pagsanap sa tubig.
Kini gilangkoban sa barangays Colonia, Fortaliza, Jagbuaya, Manga, Otso, Caridad, Marmol, Mag-atubang, Mag-alwa, Mag-antoy, ug Amatugan.
Matod ni Diamante, sagad sa maong mga barangay anaa sa ubos o nalupa nga bahin sa lungsod.
Midugang siya nga padayon pa nilang gimonitor ang sitwasyon ug ilang nabalitaan nga aduna nay mga pamilya nga napabakwet.
Gitug-an usab ni Diamante nga ang ubang lugar miabot hangtod sa ikaduhang andana ang tubig.
Gani, adunay ubang mulupyo nga nangayog tabang sa social media uban ang pag-post og hulagway sa makaluluoy nilang kahimtang. (Jhon Tadlip/JTY)
(Source: PDRRMO-Cebu Province)
(Photos courtesy of Tuburan Photo – Torvic Patindol | Asturias – Balamban Boundary-See Ann | Danao City Photo – CDRRMO-Danao City)