Cebu City – Sama sa naibtan og tunok si Gob. Gwendolyn Garcia nga nagpahiyom nga miatubang sa mga tigbalita gahapon sa iyang opisina aron paghatag sa iyang reaksyon sa pagbasura sa Sandiganbayan sa kasong pangurakot nga iyang giatubang uban sa laing pito ka kanhi opisyal sa Kapitolyo.
Ang maong reklamo adunay labot sa pagpalit sa probinsiya sa luna sa mga Balili sa brgy. Tinaan, Naga City nga ang dakong bahin naunlod pa sa dagat.
Suma pa ni Garcia, nalipay siya ug ang iyang pamilya nga naabsuwelto sa maong sumbong.
Sa nasayran, sa gipagawas nga desisyon sa Sandiganbayan niadtong Nobyembre 26, giingong napakyas sila pagpamatuod sa pangurakot nga giitsa batok kang Garcia ug sa pito ka opisyal niadto sa una niyang termino sa Kapitolyo.
Una niini, miduso ang depensa og demurrer to evidence nga nagkwestiyon sa ebidensiya sa prosekusyon nga gipresentar sa anti-graft court.
Nakalingkawas usab sa reklamo ang tag-iya sa yuta nga sila si Romeo ug Amparo Balili.
Sa nasayran, nagsumikad ang kaso sa pagpalit sa probinsiya sa 11 ka parselang luna nga adunay gilapdong 24.9 ka ektarya sa kantidad nga P98.9 milyones gikan sa pamilyang  Balili niadtong 2008. (Jhon Tadlip/JTY)
(Source & photo courtesy of Cebu Provincial Capitol)