Gipasabot karon sa syudad ilabina sa mga kadagkuan sa Roads and Traffic Administration (RTA) nga limitado lamang sa tulo ka pasahero diin ikaupat ang driver ang gitugotan nga mosakay sa motorela human gipaubos sa modified enhanced community quarantine (MECQ) ang Cagayan de Oro.
Kini ang gipadayag ni RTA Administrative Officer Benedicto ‘Doy’ Ramiro basi usab sa gipatuman nga guidelines sa National Inter-Agency Task Force (NIATF) nga magpadayon ang public transport apan 50% capacity lamang sa mga pasahero ug mosunod sa health protocols.
Ug kini nga gabayan ang gipatuman sa syudad sa mga motorela ilabina nga limitado man usab ang paggawas sa publiko, gawas lamang sa mga trabahante sa gobyerno ug pribado nga mga buhatan ug establisemento.
Hinuon, nagpahigayon na og information and education campaign ang mga traffic enforcers ngadto sa mga motorela drivers kaganihang buntag aron sila mahibalo ug mosunod sa maong gabayan.
Sa samang higayon, dili usab ipasakay ang mga pasahero nga walay face mask/face shield.
Dili na usab kinahanglan mangayo og special permit ang mga motorela operators.
Naglaum ang syudad nga hugot nga sundon sa mga motorela drivers/operators ang maong gabayan aron dili ma-extend ang pagpaubos sa MECQ sa Cagayan de Oro tungod sa grabe nga pagsaka sa kaso sa COVID-19. (ALR | City Information Office, photo courtesy by Antonio Resma Jr.)