Agig tubag sa panginahanglanon ug panginabuhian sa mga lumulupyo sa Barangay Rosita, Libjo, pormal nga gi-turnover sa Provincial Government ngadto sa MacArthur Farmer Entrepreneur Association (MAFEA) ang 995 bundle nga tiger grass panicle nga gamitong materyales sa paghimo ug soft broom/silhig nga lanot.
Kini nga mga materyales gikan pa usab sa mga Sumilao farmers sa Bukidnon nga nikabat sa kantidad nga ₱ 121,500.00 diin gipondohan sa Provincial Government para sa dugang panginabuhian sa mga membro sa MAFEA nga niabot niadtong 31 May 2021 sa Sitio General McArthur.
Dako ang kalipay sa membro sa MAFEA diin nahatagan sila ug suporta gikan sa gobyerno ilabi na sa inisyatibo ni Governor Kaka Bag-ao sa paghatag sa ila ug kahigayonan nga makigbahin sa pagpalambo sa ilang asosasyon pinaagi sa paghimo ug silhig nga dakong tabang sa ilang panginabuhian ilabi na nga padayon giatubang ang krisis sa COVID-19.
Lakip nga gipasalig niini nga ilang paningkamutan nga mapalambo ug mapahimuslan kini sa kinatibuk-ang membro sa ilang grupo ug makahatag sa ila ug mas tawhay ug luwasnon nga panginabuhian nga dili supak sa balaod ug dili makadaot sa kinaiyahan.
Usa lamang kini sa mga padayong lakang sa Provincial Government sa paghatag ug igong pagtagad sa mga people’s organization (PO) ilabi na sa mga mag-uuma ug mangingisda nga usa sa mga sektor nga nagsiguro nga adunay seguridad sa suplay sa pagkaon ang katilingban ilabi na sa panahong adunay gisagubang pandemic.
Hugot usab kining gisuportahan sa Department of Environment and Natural Resources (DENR) OIC PENRO Agapito T. Patubo diin gihatag usab niini ang 100 hectares nga luna nga nahisakop sa National Greening Program (NGP) aron mas mapahalapdan ang area pagpananom sa tiger grass nga ilang ugmadon alang sa mas daghan produktong pang-agrikultura nga maoy tinubdan sa ilang pang adlaw-adlaw nga panginahanglanon.
Tumong ug katuyoan usab niini ang pagpangilabot sa mga katawhan sa pag-amuma sa mga kakahuyan ug magsiguro nga mapanalidpan ang mga watershed area sa naasoy nga lugar samtang hugot nga giimplementar ang proyekto nga magpalambo sa ilang panginabuhian.
Lakip usab niini ang dugang pang tabang gikan sa Provincial Government pinaagi sa mga buhatan Provincial Cooperative Development Office (PCDO), Provincial Community Affairs Office (PCAO), ug Office of the Provincial Agriculturist (OPAG) nga nagsiguro alang sa mas hapsay nga kadumalahan sa ilang asosasyon pinaagi sa paghimo sa haom ug plastar nga operation manual ug business policy, ug maghatag sa ila ug igong kaalam ilabi na sa pagdala sa ilang financial statement ug dugang kapasidad sa pagpanindot sa kalidad sa ilang proyekto, magtudlo sa insaktong marketing strategy ug product development.
Sa dugang bahin nakadawat usab ang mga membro sa MAFEA ug foliar fertilizer pipila ka mga seedlings sa pechay, kangkong, okra ug sweet corn. Gitudlo-an usab sila sa insaktong pamaagi sa pagtanom sa 30-day seeds ug paggamit sa abono alang sa mas abundang harvest sa ilang mga tanom.
Si Governor Kaka Bag-ao ang abugado sa kaniadto sa Sumilao farmers sa ilang pakigbatok alang sa agrarian reform.
(Source: Dinagat Islands Provincial Information Office Facebook page)