General Santos City – NAG-ATUBANG karon og mga kasong Usurpation of Authority and Illegal use of Uniform and Insignia ang usa ka ulitawong kanhi MR. TOURISM CANDIDATE 2019 ning dakbayan sa General Santos human kini na-aktohan nga nagsul-ob og illegal nga uniporme sa pulis sulod mismo sa Headquarters sa General Santos City Police Office sa Camp Fermin Lira Jr. sa Brgy. Dadiangas West ning s’yudad.
Gi-ila lamang kini sa kapulisan nga si alyas Ed, hamtong sa panu-igon ug gidakop siya sa mga sakop sa City Tactical Operation Unit sa Gensan PNP ala-1:42 ang takna sa hapon, Enero 14, 2025 samtang nagpahulagway atubangan mismo sa monumento sa SAF-44 su-ot ang pekeng uniporme sa pulis nga adunay ranggong Police Liutenant nga gagunit usab og bull cap sa PNP.
Una niini, adunay nagtaho ngadto sa City Tactical Operation Unit nga adunay lalaking nakasul-ob og uniporme sa pulis nga naglaroy-laroy ug nagpicture-picture sa kaugalingon sa parking area sa Gensan PNP Headquarters, pero namatikdan nga wala mamao o dili tukma ang pagsuot niini’g insignia sa iyang uniporme.
Dihang gipangutana kung asa siya nga Police Station sa Gensan nadestino pakyas kining makatubag ug pakyas sab kining makapakita’g ID sa PNP dihang gipangitaan siya niini ug didto na kini mi-angkon sa iyang pagkatawo ug dili siya tinuod nga pulis ug mitug-an nga napalit lamang niya sa online ang gisu-ot nga Police uniform.
Nabalhog na karon sa selda sa kapulisan ang nasampit nga lalaki ug ga-atubang og pipila ka kaso isip bunga sa pagka-ignorante niini sa balaud. (Rem Agdon)
Photos: GSCPO