Padayon ang search operation alang sa 6-anyos nga bata nga si John Jio Caballes, nga nawala niadtong Enero 9, 2025, sa Barangay Libjo, lungsod sa Tabogon, Sugbo.
Si Mayor Francis Edward T. Salimbangon personal nga mibisita sa lugar aron paghatag og prioridad sa pagpangita sa bata. Kauban niya sa operasyon ang mga sakop sa Tabogon PNP, Municipal Disaster Risk Reduction and Management Office (MDRRMO), Bureau of Fire Protection (BFP), Philippine Coast Guard (PCG), ug ang mga opisyales sa Barangay Libjo.
Sumala sa impormasyon, si John Jio gikatahong nawala sa dili pa matino nga kahimtang, hinungdan nga na alarma ang iyang pamilya ug mga silingan. Ang operasyon naglakip sa pag-scuba diving sa dagat, pagsusi sa kakahoyan, ug paglibot sa mga dapit nga posibleng nahimutangan sa bata.
“Wala namo pasagdi ang sitwasyon. Kining bataa dili lang responsibilidad sa iyang pamilya, apan responsibilidad nato isip komunidad. Ato kining himuong paningkamot para siya makit-an,” matod pa ni Mayor Salimbangon.
Nagpabiling buhi ang paglaom sa pamilya ug mga residente samtang nagpadayon ang search and rescue efforts. Ang publiko gipasidaan nga magmatngon ug mosuporta pinaagi sa paghatag og impormasyon nga makatabang sa kaso.
Ang lokal nga gobyerno nagpasalamat sa tanang ahensya ug mga boluntaryo nga nagtampo sa operasyon.
📸 Tabogon PNP
I via Renante Socia Lada