Cebu City – Nakita nga dako pa ang kuwang nga trabahoonon sa “higher floors” sa Cebu City Medical Center (CCMC) nga pabiling under construction, basi sa nasuta, Lunes, Agosto 9, 2021.
Gibutyag ni Hospital Administrator Yvonne Cania, nga dili sila madayon pagbukas sa “three upper floors” sa CCMC karong adlawa.
“Dili. Nitan-aw gyud mi sa diperensya. Nag on site mi. Ang ocular with the acting mayor kung unsay mga kinahanglan pa trabahoon,” matod ni Cania.
Sigon pa ni Cania nga ilang nahukman pag extend sa work timeline sa CCMC aron dili ma compromise ang panglawas sa mga pasyente ug mga trabahante.
“Dili nato angay gyud idali-dali, labi na health na sa tawo,” dugang ni Cania.
Suma pa sa administrator nga padayong gitiwas ang trabaho nga naglakip sa pagkompleto sa ramp, comfort rooms ug isolation rooms.
Una niini, buot ni Acting Cebu City Mayor Michael Rama nga ang “upper three” floors sa CCMC nga taudtaud nang na delay, nga maka dawat na ug mga pasyente sugod unta karong adlawa.
Gani, mihulga pa si Rama nga i terminate ang contractor nga in charge sa higayon nga dili nila mahuman sa deadline.
Pero, matod ni Cania, nga nisugyot sila ni Rama nga hatagan ug maximum tulo ka semana pagbukas sa nahisgutang tulo ka andana. (Jhon Tadlip)
(News & photo courtesy of Cebu City Medical Center)